ஜனாதிபதி அனுர குமார திஸாநாயக்க, நாட்டில் நடைமுறையில் உள்ள தேசிய போதைப்பொருள் ஒழிப்பு நடவடிக்கையின் முன்னேற்றத்தை நேற்று ஆய்வு செய்தார். “ஒரே தேசம் – ஒன்றுபட்ட மக்கள்” (A Nation United) தேசிய வழிநடத்தல் குழுவின் மூன்றாவது கூட்டத்திலேயே இந்த ஆய்வு இடம்பெற்றதாக ஜனாதிபதி ஊடகப் பிரிவு தெரிவித்துள்ளது. போதைப்பொருள் ஒழிப்பு நடவடிக்கைகளை ஒருங்கிணைக்கும் நோக்கில் உருவாக்கப்பட்ட இந்தக் குழு, அரசாங்கம், பாதுகாப்புப் படைகள், சிவில் அமைப்புகள் மற்றும் பொதுமக்கள் ஆகிய அனைவரையும் ஒன்றிணைக்கும் ஒரு தேசிய தளமாக செயல்படுகிறது.

கூட்டத்தில் உரையாற்றிய ஜனாதிபதி, நாட்டின் உட்கட்டமைப்பு மற்றும் பொருளாதார வளர்ச்சி எவ்வளவு முக்கியமோ, அதே அளவுக்கு சமூகத்தின் நலனும் நிலைத்தன்மையும் முக்கியமானவை எனக் குறிப்பிட்டார். போதைப்பொருள் பழக்கம் இன்று ஒரு தனிப்பட்ட பிரச்சினையாக அல்லாமல், முழு நாட்டையும் பாதிக்கும் ஒரு தேசிய பேரழிவாக மாறியுள்ளதாக அவர் சுட்டிக்காட்டினார். இதனை முற்றாக ஒழிப்பதற்காக ஒவ்வொரு குடிமகனும் தமது பொறுப்பை உணர்ந்து செயல்பட வேண்டிய அவசியம் இருப்பதாகவும் அவர் வலியுறுத்தினார்.

நாட்டில் பரவலாகக் காணப்படும் போதைப்பொருள் பிரச்சினையை பல்துறை அணுகுமுறையினூடாக வேரோடு களைவதே “க்விட் – ஒரே தேசம் ஒன்றுபட்டு” (Quit – A Nation United) என்ற தேசிய நடவடிக்கையின் பிரதான நோக்கமாகும். தீவெங்கும் போதைப்பொருள் வழங்கல் வலையமைப்புகளை சிதைத்தல், சோதனை நடவடிக்கைகள் மற்றும் சுற்றிவளைப்புகளை விரிவுபடுத்தல், போதைப்பொருள் அடிமைகளை மறுவாழ்வுக்கு கொண்டு வருதல், போதைப்பொருள் பயன்பாட்டைத் தடுக்க முன்கூட்டிய தடுப்பு திட்டங்களை நடைமுறைப்படுத்தல் மற்றும் சமூகங்களைப் பலப்படுத்தல் ஆகியவை இந்தத் திட்டத்தின் முக்கிய கூறுகளாகும். “போதைப்பொருள் இல்லா நாடு – மகிழ்ச்சியான நாளை” (A Drug-Free Nation – A Happier Tomorrow) என்ற கருப்பொருளின் கீழ் இந்த தேசிய இயக்கம் செயல்படுத்தப்பட்டு வருகிறது.

இந்த முயற்சி, அரசாங்கம், பாதுகாப்புப் படைகள், தன்னார்வ மற்றும் சிவில் அமைப்புகள், மற்றும் அனைத்து குடிமக்களையும் உள்ளடக்கிய ஒருங்கிணைந்த தேசிய முன்னணியாக செயல்படுகிறது. போதைப்பொருள் கடத்தல்காரர்கள் மற்றும் விநியோகஸ்தர்கள் மீது வலுவான சமூக அழுத்தத்தை உருவாக்குவதோடு, போதைப்பொருள் பயன்படுத்துவோருக்கு மறுவாழ்வு வாய்ப்புகளை வழங்குவதே இதன் பிரதான இலக்காகும்.

கூட்டத்தின் போது, தற்போது நடைபெற்று வரும் சோதனை நடவடிக்கைகள், கைது நடவடிக்கைகள் மற்றும் மறுவாழ்வு செயல்முறைகளின் முன்னேற்றம் குறித்து விரிவான கலந்துரையாடல் இடம்பெற்றது. இந்த தேசிய பணிக்காக அர்ப்பணிப்புடன் செயல்பட்டு வரும் அனைத்து நிறுவனங்கள், அதிகாரிகள் மற்றும் பொதுமக்களுக்கும் ஜனாதிபதி தனது பாராட்டையும் நன்றியையும் தெரிவித்தார்.

2025 ஜனவரி 1 முதல் 2026 ஜனவரி 5 வரை கைப்பற்றப்பட்ட போதைப்பொருட்களின் அளவுகள் குறித்து கூட்டத்தில் தகவல் வெளியிடப்பட்டது. அதன்படி, 1,821.174 கிலோகிராம் ஹெரோயின், 3,865.710 கிலோகிராம் கிரிஸ்டல் மெத் (ஐஸ்), 17,189.377 கிலோகிராம் கஞ்சா, 38.958 கிலோகிராம் கோகைன் மற்றும் 40 லட்சத்துக்கும் அதிகமான போதை மாத்திரைகள் மற்றும் காப்ஸ்யூல்கள் கைப்பற்றப்பட்டுள்ளதாக தெரிவிக்கப்பட்டது.

முந்தைய கூட்டத்தில் எடுக்கப்பட்ட தீர்மானங்களுக்கு அமைவாக, கைப்பற்றப்பட்ட போதைப்பொருள் கையிருப்புகளை விரைவாக அழிப்பதற்கான புதிய சட்டங்களை உருவாக்கும் பணியின் முன்னேற்றம் குறித்தும் கவனம் செலுத்தப்பட்டது. இந்த சட்டச் செயல்முறையை விரைவுபடுத்துமாறு சம்பந்தப்பட்ட அதிகாரிகளுக்கு ஜனாதிபதி அறிவுறுத்தினார். தற்போது பாதுகாப்பில் உள்ள போதைப்பொருட்களை அழிக்கும் நடவடிக்கைகளின் நிலையும் விவாதிக்கப்பட்டது.

மேலும், போதைப்பொருளுக்கு அடிமையானவர்களின் சமூக பின்னணியை அடையாளம் காண வேண்டிய அவசியம் குறித்தும், அதற்காக தரவுகளைச் சேகரிக்கும் ஒரு விரிவான ஆய்வை மேற்கொள்ள வேண்டியதன் முக்கியத்துவம் குறித்தும் கலந்துரையாடப்பட்டது. இத்தகைய தரவுகள், எதிர்கால கொள்கை முடிவுகள் மற்றும் மறுவாழ்வு திட்டங்களை மேலும் பயனுள்ளவையாக வடிவமைக்க உதவும் எனக் குறிப்பிடப்பட்டது.

தேசிய திட்டத்தின் செயல்பாட்டை விரிவுபடுத்தும் வகையில் கல்வி நிறுவனங்கள், அரச நிறுவனங்கள், தன்னார்வ அமைப்புகள் மற்றும் கலாசார அமைப்புகளை இணைத்து ஒரு வலுவான அமைப்பை உருவாக்குவது குறித்தும் கலந்துரையாடல் நடைபெற்றது. அதேபோல், கிராமங்களுக்கும் வழிபாட்டுத் தலங்களுக்கும் உள்ள நெருங்கிய உறவை பயன்படுத்தி, மதத் தலைவர்களின் பங்கேற்புடன் பொதுமக்கள் விழிப்புணர்வு நிகழ்ச்சிகளை நடத்துவது குறித்தும் முடிவுகள் எடுக்கப்பட்டன.

இந்த கூட்டத்தில் மல்வத்து பீடத்தின் அனுநாயக்கர் மிக வணக்கத்திற்குரிய நியாங்கொட விஜிதசிறி தேரர், அஸ்கிரிய பீடத்தின் அனுநாயக்கர் மிக வணக்கத்திற்குரிய நரம்பனாவ ஆனந்த தேரர், ராமண்ண மகா நிகாயத்தின் அனுநாயக்கர் மிக வணக்கத்திற்குரிய வாலேபொட குணசிறி தேரர், மிக வணக்கத்திற்குரிய குப்பியவத்தே போதானந்த தேரர் உள்ளிட்ட மகா சங்கத்தினர் பங்கேற்றனர். அதேபோல், கத்தோலிக்க, இந்து மற்றும் முஸ்லிம் மதத் தலைவர்கள் உள்ளிட்ட பல்வேறு மதப் பிரதிநிதிகளும் கலந்துகொண்டனர்.

பொது பாதுகாப்பு மற்றும் பாராளுமன்ற அலுவல்கள் அமைச்சர் ஆனந்த விஜேபால, ஜனாதிபதியின் செயலாளர் டாக்டர் நந்திக சனத் குமாரநாயக்க, பாதுகாப்பு அமைச்சின் செயலாளர் ஓய்வு பெற்ற விமான துணை மார்ஷல் சம்பத் துயகொந்த உள்ளிட்ட உயர் அதிகாரிகளும் இந்தக் கூட்டத்தில் பங்கேற்றனர்.