மூன்று மாதங்களுக்குள் தரவுத்தள முன்மொழிவை சமர்ப்பிக்க தொல்லியல் துறைக்கு உத்தரவு
IT காலிப்பணியிடங்களை அவசரமாக நிரப்ப அறிவுறுத்தல்
சுற்றுலா வளர்ச்சிக்காக துறை இணையதளத்தை உடனடியாக புதுப்பிக்க வேண்டுமென வலியுறுத்தல்
அடையாளம் காணப்பட்ட தொல்லியல் தளங்களில் சுமார் பாதி இன்னும் வர்த்தமானியில் அறிவிக்கப்படவில்லை – ஒரு மாதத்துக்குள் விரிவான அறிக்கை கோரல்
யுனெஸ்கோ உலக பாரம்பரிய நியமனங்கள் மற்றும் முன்மொழிவுகள் குறித்த முன்னேற்ற அறிக்கை கோரிக்கை

இலங்கையில் உள்ள அனைத்து பழமையான பொருட்கள் மற்றும் தொல்லியல் அகழ்வாராய்ச்சி தளங்களை உள்ளடக்கிய, தொடர்ச்சியாக புதுப்பிக்கப்படும் மையப்படுத்தப்பட்ட டிஜிட்டல் தரவுத்தளம் அவசரமாக தேவைப்படுகின்றதாக அரசுக் கணக்குகள் குழு (COPA) வலியுறுத்தியுள்ளது. இத்தகைய அமைப்பு இல்லாதது பாரம்பரிய மேலாண்மை, வெளிப்படைத்தன்மை மற்றும் சுற்றுலா ஊக்குவிப்பை பாதிக்கிறது என குழு எச்சரித்துள்ளது.

செவ்வாய்க்கிழமை (6) பாராளுமன்றத்தில் நடைபெற்ற COPA கூட்டத்தில், குழுத் தலைவர் நாடாளுமன்ற உறுப்பினர் கபீர் ஹாஷிம் தலைமையில், தொல்லியல் துறையைச் சார்ந்த 2021, 2022 மற்றும் 2023 ஆம் ஆண்டுகளுக்கான கணக்காயர் நாயகத்தின் அறிக்கைகள் பரிசீலிக்கப்பட்டதுடன், துறையின் தற்போதைய செயல்திறனும் ஆய்வு செய்யப்பட்டது.

2023 அக்டோபர் 3 ஆம் திகதியே, அனைத்து தொல்லியல் அகழ்வுத் தளங்கள், கண்டுபிடிப்புகள், அகழ்வின் முடிவுகள், தொடர வேண்டுமா நிறுத்த வேண்டுமா என்பதற்கான தீர்மானங்கள் மற்றும் எதிர்கால ஆய்வுக்குத் தேவையான பகுதிகள் ஆகிய விவரங்களை உள்ளடக்கிய விரிவான தரவுத்தளத்தை உருவாக்க COPA பரிந்துரைத்திருந்தது என குழு நினைவூட்டியது.

எனினும், அதிகாரிகள் தெரிவித்ததாவது, இவ்வாறான முழுமையான அமைப்பு இன்னும் உருவாக்கப்படவில்லை என்றும், தற்போதுள்ள பதிவுகள் பெரும்பாலும் அகழ்வாராய்ச்சி அனுமதிகளுக்கே மட்டுப்படுத்தப்பட்டுள்ளன என்றும் கூறப்பட்டது.

தரவு மேலாண்மையின் முக்கியத்துவத்தை வலியுறுத்திய குழு, மையப்படுத்தப்பட்ட தரவுத்தளம் தேசிய பாரம்பரியத்தை பாதுகாப்பதற்கும், கொள்கை உருவாக்கத்திற்கும், பொதுமக்கள் அணுகலுக்கும் இன்றியமையாதது என தெரிவித்தது. தேவையானால், இத்தகைய அமைப்பை நிறுவ தொல்லியல் துறைக்கு உதவ தயாராக இருப்பதாகவும் COPA தெரிவித்தது.

மேலும், தொல்லியல் துறையின் தகவல் தொழில்நுட்ப திறனில் உள்ள கடுமையான குறைபாடுகளையும் குழுத் தலைவர் சுட்டிக்காட்டினார். 12 IT அதிகாரிகளை நியமிக்க அனுமதி வழங்கப்பட்டிருந்த போதிலும், தற்போது ஒரே ஒரு அதிகாரி மட்டுமே பணியில் உள்ளதாகவும், அவர் தலைமையகத்துடன் இணைக்கப்படவில்லை என்றும் தெரிவிக்கப்பட்டது.

இந்த காலிப்பணியிடங்களை அவசரமாக நிரப்பி, தொழில்நுட்ப திறனை வலுப்படுத்த அதிகாரிகளுக்கு COPA உத்தரவிட்டது. மையப்படுத்தப்பட்ட டிஜிட்டல் தரவுத்தளத்திற்கான முறையான முன்மொழிவை மூன்று மாதங்களுக்குள் சமர்ப்பிக்கவும் குழு கேட்டுக்கொண்டது.

தொல்லியல் துறையின் அதிகாரப்பூர்வ இணையதளம் முறையாக புதுப்பிக்கப்படாததையும் குழு உறுப்பினர்கள் சுட்டிக்காட்டினர். சுற்றுலா ஊக்குவிப்புக்கும் பொதுமக்கள் விழிப்புணர்வுக்கும் புதுப்பிக்கப்பட்ட இணையதளம் அத்தியாவசியம் எனக் குறிப்பிட்ட குழு, அதற்கான நடைமுறையை உருவாக்கி உடனடி நடவடிக்கை எடுக்க துறைக்கு அறிவுறுத்தியது.

மேலும், 2023 டிசம்பர் 31 நிலவரப்படி அடையாளம் காணப்பட்ட தொல்லியல் தளங்களில் 48 சதவீதம் இன்னும் வர்த்தமானியில் அறிவிக்கப்படாமல் இருப்பது சட்டப் பாதுகாப்பு மற்றும் பாதுகாப்பு நடவடிக்கைகள் தொடர்பில் கவலைக்கிடமானது என COPA தெரிவித்தது. இதுகுறித்து, வர்த்தமானியில் அறிவிக்கப்பட்ட மற்றும் அறிவிக்கப்படாத தளங்கள் தொடர்பான விரிவான அறிக்கையை ஒரு மாதத்துக்குள் சமர்ப்பிக்க பரிந்துரை செய்யப்பட்டது.

அத்துடன், யுனெஸ்கோ உலக பாரம்பரிய நியமனத்திற்காக அடையாளம் காணப்பட்ட தொல்லியல் தளங்கள் மற்றும் அதனுடன் தொடர்புடைய முன்வரைவு முன்மொழிவுகள் குறித்த அறிக்கையையும் சமர்ப்பிக்க COPA கோரியுள்ளது. இதன் மூலம் இலங்கையின் உலகளாவிய பண்பாட்டு அடையாளத்தை உயர்த்த வேண்டியதன் அவசியம் வலியுறுத்தப்பட்டுள்ளது.